Reklam agentliyi şirkətlərə məhsul və ya xidmətlərini düzgün şəkildə tanıtmaqda, düzgün auditoriyaya çatmaqda və yaradıcı kampaniyalar yaratmaqda kömək edən peşəkar qurumdur.
Bu agentliklərdə marketinq, dizayn, media planlaşdırma və kommunikasiya sahəsində ixtisaslaşmış mütəxəssislər çalışır.
Reklam agentliyinin əsas məqsədi brendin mesajını uyğun kanallarla, doğru zamanda və düzgün formada çatdırmaqdır. Bunun üçün onlar bazar araşdırması aparır, alıcı davranışlarını təhlil edir, yaradıcı məzmun hazırlayır, reklam kampaniyaları yaradır.
Reklam agentliyi hansı xidmətləri göstərir?
Reklam agentlikləri müştərilərinin marketinq məqsədlərinə çatmalarına kömək etmək üçün müxtəlif xidmətlər təqdim edir.
Göstərilən agentlik xidmətlərini 6 yerə bölə bilərik.
Dizayn xidmətləri
Dizayn xidmətləri reklam agentliklərinin təklif etdiyi əsas xidmət sahələrindən biridir.
Bura misal olaraq SMM postları, loqo və brendinq, çap məhsulları dizaynı, UX/UI dizayn və s. daxildir.
Kreativ dizayn strategiyaları bazarda fərqlənməyə, müştərini cəlb etməyə və satışları artırmağa kömək edir.
Kontent marketinq
Sözlər ən azı vizuallar qədər vacibdir. Ona görə də kontent marketinq reklam agentliklərinin ən çox göstərdiyi xidmətlərə daxildir. Çünki məzmun və kopiraytinq istənilən sahə üçün lazımdır. Dizayn xidmətləri üçün də, PR üçün də, PPC xidməti üçün də.
Məqalələr, bloq yazıları, reklam sloqanları və ssenariləri, infoqrafikalar və sosial media postları kontent marketinqin əsas formalarıdır
Rəqəmsal marketinq
Əksər reklam agentliyi bu sahədə SEO, PPC, sosial media marketinqi və email marketinq kimi rəqəmsal marketinq xidmətləri göstərir.
Rəqəmsal marketinq ölçülə bilən nəticələr verdiyi üçün bu sahədə xidmət göstərən agentliklər də olduqca geniş yayılıb.
Ənənəvi marketinq
Ənənəvi marketinq uzun illərdir markaların kütləvi auditoriyaya çatmaq üçün istifadə etdiyi əsas reklam üsullarından biridir. Bu sahəyə diqqət azalsa da, hələ də effektivliyini qoruyub saxlayır.
Bu marketinq növünə televiziya, radio, qəzet, jurnallar və açıq hava reklamları (billboardlar) daxildir
Neyromarketinq
Neyromarketinq istehlakçı davranışlarını anlamaq və onların qərarvermə prosesinə təsir etmək üçün neyroelmi metodlardan istifadə edən marketinq sahəsidir.
Yanaşma müştərilərin emosional reaksiyalarını, diqqətini və yaddaşını ölçməklə daha effektiv reklamlar yaratmağa imkan verir.
PR: İctimaiyyətlə əlaqələr
Agentliklər həmçinin brendin imicinin qorunması və ictimaiyyətlə əlaqələrinin düzgün qurulması üçün PR xidmətləri göstərir.
Bura mətbuat açıqlamaları, media ilə əlaqələr, tədbir təşkilatçılığı və böhran zamanı kommunikasiya daxildir. PR brendə qarşı inam yaratmaq və müsbət imici qorumaq üçün vacib rol oynayır.
Reklam agentliklərinin 6 növü
Hər bir agentlik növü müəyyən ehtiyaclara cavab verir və fərqli xidmətlər təqdim edir.
Agentlik seçərkən onların hansı sahədə güclü olduqlarını bilmək uğurlu əməkdaşlıq üçün vacibdir.
- 360° Reklam Agentlikləri
360° agentliklər marketinq və reklam sahəsində hərtərəfli xidmətlər təqdim edir.
Bu agentliklər brend strategiyasının qurulmasından tutmuş dizayn, media planlaşdırma, rəqəmsal marketinq və ictimaiyyətlə əlaqələrə qədər bütün mərhələləri əhatə edir.
Onlar böyük və davamlı kampaniyalar üçün ideal seçimdir, çünki bütün prosesləri eyni komanda idarə edir və nəticədə vahid və koordinasiyalı yanaşma ortaya çıxır.
- Rəqəmsal Reklam Agentlikləri
Bu agentliklər yalnız onlayn reklam və rəqəmsal platformalara fokuslanır.
SEO, PPC, sosial media marketinqi, kontent marketinqi, email kampaniyaları və analitika kimi xidmətlər göstərirlər.
Rəqəmsal agentliklə daha dəqiq hədəf auditoriyaya çatmağa kömək edir.
- Ənənəvi Reklam Agentlikləri
Ənənəvi agentliklər televiziya, radio, qəzet və jurnallar kimi klassik reklam kanallarında ixtisaslaşır.
Onlar geniş auditoriyalara çatmaq üçün kütləvi reklam kampaniyaları hazırlayır. Brendin yerli və ya milli səviyyədə tanıdılması məqsədilə bu tip agentliklər tez-tez istifadə olunur.
- Kreativ Butiklər
Kreativ butiklər əsasən yaradıcı dizayn və konsept üzərində fokuslanır.
Onlar kiçik ölçülü olsa da, orijinal və fərqli ideyalarla fərqlənirlər.
Əgər siz artıq marketinq strategiyasına sahibsinizsə və sadəcə fərqli vizual və konseptual yanaşma axtarırsınızsa, bu tip agentliklər ideal ola bilər.
- İctimaiyyətlə Əlaqələr (PR) Agentlikləri
Bu agentliklər şirkətlərin ictimai imicini idarə edir.
Mətbuat açıqlamaları hazırlayır, media ilə əməkdaşlıq qurur, tədbirlər təşkil edir və böhran vəziyyətlərində düzgün kommunikasiya strategiyası formalaşdırırlar.
Onların məqsədi şirkətə qarşı ictimai etimadı artırmaq və pozitiv rəy formalaşdırmaqdır.
- Daxili Agentliklər
Bəzi şirkətlər öz daxili reklam komandalarını qururlar.
Bu tip agentliklər şirkət daxilində fəaliyyət göstərir və markanı daha dərindən tanıyır.
Onlar daha operativ işləsə də, bəzən xarici agentliklər kimi geniş resurslara və xarici baxış bucağına malik olmaya bilərlər.
Reklam agentliyi ilə əməkdaşlığın üstünlükləri
Rəqabətli bazar şəraitində brendi ön plana çıxarmaq üçün peşəkar reklam agentliyi ilə əməkdaşlıq etmək mühüm addımdır.
Reklam agentlikləri müxtəlif sahələrdə ixtisaslaşmış mütəxəssislərdən ibarət komandaya malik olduqları üçün daha keyfiyyətli və effektiv nəticələr əldə etməyə imkan yaradır. Uğurlu əməkdaşlıqlar biznesin həm vaxtına, həm də resurslarına qənaət etməklə yanaşı, reklamın nəticəyönlü olmasına şərait yaradır.
Agentliklər daim trendləri izlədikləri üçün brendiniz müasir və aktual qalır. Bundan əlavə, reklam agentlikləri texniki detallar, yəni dizayn, məzmun, media planlaşdırma və analitika kimi sahələrdə ixtisaslaşdıqları üçün sizin yalnız biznesinizin inkişafına fokuslanmağınıza imkan verir.
Əməkdaşlığın digər bir üstünlüyü də reklam nəticələrinin ölçülməsi və təhlilidir. Agentliklər kampaniyaların performansını izləyir, hesabatlar təqdim edir və ehtiyac olduqda strategiyanı yenidən formalaşdırırlar. Bu çevik yanaşma daha yüksək ROI əldə etməyə şərait yaradır.
Reklam agentliyi necə fəaliyyət göstərir?
Reklam agentliyi ilə uğurlu əməkdaşlıq üçün onların necə işlədiyini bilmək vacibdir. Agentliklər adətən mərhələli və strukturlaşdırılmış sistemlə fəaliyyət göstərirlər. Bu da kampaniyaların effektivliyini təmin edir.
İlk mərhələdə müştəri ilə görüş keçirilir və brif alınır. Bu zaman şirkətin məqsədləri, hədəf auditoriyası və gözləntiləri müzakirə olunur.
Daha sonra agentlik bazar araşdırması aparır, rəqibləri təhlil edir və əsaslanmış strategiya hazırlayır. Bu strategiyada mesaj, kanallar, zamanlama və büdcə planlaşdırılır.
Strategiya təsdiqləndikdən sonra kreativ komanda işə başlayır. Ardınca nəzərdə tutulan işlər həyata keçirilir və reklamların ən uyğun platformalarda yerləşdirilməsi təmin olunur.
Kampaniya başladıqdan sonra agentlik onun gedişatını izləyir və nəticələri analiz edir. İzləmə prosesi real vaxtda istifadəçi davranışları və effektivlik göstəriciləri əsasında aparılır. Kampaniya sonunda isə ətraflı hesabat təqdim edilir və ehtiyac varsa, təkmilləşdirmələr edilir.
Düzgün agentliyi necə seçməli?
Uğurlu marketinq kampaniyası üçün doğru reklam agentliyi seçimi həlledici rol oynayır. İlk olaraq, öz məqsədlərinizi aydın şəkildə müəyyən etməlisiniz. Bu, sizə uyğun agentlik profilini müəyyən etməyə kömək edəcək.
Seçdiyiniz agentliyin əvvəlki layihələrinə, portfoliosuna və müştəri rəylərinə baxın. Sizin fəaliyyət sahənizdə təcrübələri varsa, bu əlavə üstünlükdür. İlk görüşlərdə onların sizinlə necə ünsiyyət qurduğuna diqqət yetirin.
Yalnız kreativlik yetərli deyil. Agentlik strateji düşünməli və nəticələri ölçə bilməlidir. Eyni zamanda hesabatlar vaxtı-vaxtında olmalıdır. Həmçinin qiymətlərin şəffaf təqdim edilməsi və sizin büdcənizə uyğun olması önəmlidir.
Nəticə
Reklam agentliyi brendin tanınması və effektiv kommunikasiya üçün güclü tərəfdaşlardır. Düzgün agentlik yaradıcı yanaşma, strateji planlaşdırma və texniki biliklərlə kampaniyalarınızın uğurla həyata keçirilməsinə kömək edir.
